A responsable de Medio Ambiente, María Xosé Porteiro, recolle o venres 20 de xuño as distincións concedidas pola Federación europea de educación ambiental a aqueles concellos nos que se realiza un esforzo especial para o mantemento, limpeza e xestión das súas praias en consonancia co respecto polo contorno.
O concelleiro de Patrimonio Histórico, Xosé Carlos Arias, realizou unha visita de recoñecemento ao Casco Vello cos técnicos do departamento para facer unha diagnose do labor de intervención integral dirixido a trocar os modos de vida dos residentes.
O alcalde Ventura Pérez Mariño amosou a súa satisfacción pola marcha do Instituto Feiral e do nivel do sector do aluminio no transcurso do acto de inauguración de Alumostra celebrado en Cotogrande. Ó acto asistiu tamén o conselleiro de Industria e Comercio, Juan Rodríguez Yuste.
Distintas formas de agrupación humana, dende a reunión á masa despersonalizada, constitúen o eixo da exposición "Agrupémonos todos. Gregarismo, lecer e outros motivos de xuntanza", a nova mostra temática que o venres, 20 de xuño, inaugura o Museo de Arte Contemporánea.
O curso de verán "Prevención e responsabilidades en instalacións e actividades deportivas" aborda as estratexias fronte os riscos laborais no eido do exercicio físico. Organizado polo Concello en colaboración coa Universidade de Vigo pretende dotar os asistentes das habilidades necesarias para a organización e xestión da prevención nos equipamentos deportivos.