O Concello de Vigo dispón no edificio Asefal dun centro de formación en novas tecnoloxías no que se impartirán cursos a traballadores municipais e a diversos colectivos cidadáns. O centro créase a través dun convenio subscrito entre o Concello e Telefónica Telecomunicaciones Públicas S.A., empresa encargada de equipar o local habilitado pola administración municipal.
O Concello de Vigo xa dispón dunha cartografía dixital de todo o termo municipal que permitirá mellorar a xestión dos padróns e facilitará os traballos de planeamento urbanístico. A cartografía elaborouse a través dun convenio co Centro de Xestión Catastral do Ministerio de Facenda.
Un convenio de colaboración entre o Concello de Vigo e o museo municipal "Quiñones de León" permitirá darlle prioridade de uso por parte do Museo de Arte Contemporánea aos fondos histórico-artísticos dependentes do museo municipal para a realización de exposicións temporais.
A Concellería de Participación Cidadá organiza o seminario "Novo marco normativo para ONLs" (organizacións non lucrativas) que se celebrará no Centro de Servicios Socio-comunitarios do Casco Vello.