O Concello recorre o rexeitamento da Xunta a desafectar para o uso docente o antigo Colexio Virxe do Rocío
O alcalde anunciou este venres que o Concello presentará un recurso de alzada en contra da resolución da Xunta que rexeita a solicitude da desafección de uso docente do vello edificio do colexio Virxe do Rocío para revertelo a Vigo co fin de transformalo nun centro para actividades sociais e culturais para a veciñanza de Coia. "Está sen uso docente desde 2012", afirmou.
Abel Caballero explicou que o Concello recorrerá a resolución da Consellería de Educación, Educación e Universidades que rexeita a solicitude da desafección para o uso docente do antigo edificio do Colexio Virxe do Rocío, e mantén a negativa para reverter o edificio ao patrimonio municipal. “Dixémoslle á Xunta que tiña que devolver ao Concello o edificio porque xa non está dedicado aos fins para os que foi cedido, que era educación de ensino primario, e non quere porque quere quedar con el para facer temas de profesorado, que me parece ben, pero que constrúa un edificio e non quede cun do Concello de Vigo que queremos que sexa para a cidadanía".
O rexedor recalcou que o Concello é consciente de que o edificio debe ser rehabilitado “porque non está en condicións nestes momentos para o profesorado nin para o ANPA” e que tras a reforma “tamén o dedicaremos ao ANPA e a asociacións de Coia que é para o que o queremos”.
Humanizacións
A Xunta de Goberno adxudicou hoxe as obras de mellora e pavimentación da contorna das rúas Brasil, Cuba, Santo Domingo e Guatemala. “En catro meses imos cambiar radicalmente a zona”, afirmou o alcalde ao indicar que as obras comezarán a finais do mes de xaneiro. Destacou que a humanización inclúe a renovación da capa de rodadura e dos pavimentos, e o firme nas zonas que se atopan en mal estado, ademais das redes de servizo.