O Freestyle Motocross regresa a O Marisquiño
É unha das novidades da XXV edición do festival que se celebra entre o 7 e o 10 de agosto en Samil onde se presentou este martes. Seis pilotos competirán nesta disciplina que se executará sobre dúas ramplas alcanzando os 14 ou 15 metros de altura.
No acto, o alcalde convidou a toda a cidade a participar no Marisquiño que este ano celebra o seu 25 aniversario emprazando á cidadanía a “liberar toda a fin de semana” para poder gozar do “espectáculo grandioso” que ofrecerá esta nova edición. Así, sobre a modalidade de Freestyle Motocross que regresa este ano destacou a presenza de medallistas olímpicos co valor engadido de que poden verse “totalmente gratis”.
Carlos Domínguez, Pity, director e promotor de O Marisquiño, puxo en valor a colaboración municipal polo “apoio enorme e tódalas facilidades” do Concello para poder desenvolver esta nova edición do festival. Amais, David Falagan, responsable Freestyle Motocross do Marisquiño explicou que os pilotos alcanzarán na súa exhibición os 14-15 metros de altura a través de dúas ramplas, que é a primeira vez que se utilizan así en Europa, e contarán coa participación de 6 pilotos, entre eles, un varias veces campión do mundo.
O Freestyle Motocross (FMX) é unha disciplina que xa formou parte do programa de competicións do evento no pasado e que agora volve cun espectáculo innovador para sumarse ao 25 aniversario do festival. O público será o encargado de elixir a mellor rolda de saltos que realizará cada piloto. Ao gañador de cada competición entregaráselle un casco do 25 aniversario de O Marisquiño e o que reúna máis cascos durante os días será o gañador final da proba. A competición celebrarase en dobre sesión pola tarde e durante a posta de sol na praia de Samil, na zona que hai a continuación da pista de Automodelismo, ocupando unha superficie de ata 250 metros de longo.
O regreso do Freestyle Motocross a O Marisquiño súmase a outras xa presentadas como a apertura dun segundo escenario musical dedicado á música electrónica, o traslado do Basket 3x3 desde a zona do Porto a Samil e a presentación dun novo final de percorrido para o Descenso Urbano.