Preto de 130 profesionais atenderán as praias de Vigo entre o 15 de xuño e o 15 de setembro
A partir do 15 de xuño, e ata o 15 de setembro, estarán activos os dispositivos de seguridade dos areais de Vigo. Son arredor de 130 profesionais os que prestarán os seus servizos en 13 praias da cidade.
O próximo domingo 15 de xuño arrancará o servizo de socorrismo nas praias de Vigo que estará operativo ata o 15 de setembro. Cun orzamento de 850.000 euros anuais, prestarase atención a 13 praias: Rodas, Fortiñón, Canido, O Vao, Fontaíña, Samil, Argazada, La Fuente (Tombo do Gato), Santa Baia, Carril, O Adro, A Punta e O Mende, nova incorporación.
Son setenta socorristas aos que se sumarán 24 axentes da Policía Local, 12 socorristas adicionais nas piscinas de Samil e unha vintena de traballadores da limpeza. En total, resumiu Caballero, son 130 profesionais os que atenderán os areais da cidade durante todo o verán.
O servizo contempla como novidade deste ano a incorporación da vixilancia e o rescate con motos acuáticas que terá a Samil como centro base para atender as necesidades do resto das praias de Vigo.
O catálogo de atencións á cidadanía integra a vixilancia dos areais por parte dos socorristas que se encargarán de facer respectar os sinais das zonas de uso das praias e os distintos avisos, así como os rescates na auga, e os avisos de emerxencia. A isto súmase a asistencia sanitaria de primeiros auxilios, unha ambulancia para as persoas súfranse un accidente, e a seguridade e a accesibilidade no baño de persoas con mobilidade reducida.
Horarios
Durante os meses de xullo e agosto, as 13 praias terán servizo todos os días de 12,00 a 20,00 h, agás Samil, que comezará ás 11,00.
Quincena de xuño e de setembro:
-Samil / Argazada/ Vao / Fortiñón: De luns a venres (16,00 a 20,00) / Sábado e domingo (12,00 a 20,00)
-Rodas:Todos os días de 13,15 a 19,00
-Resto de praias: Sábado e domingo (12,00 a 20,00)