Abel Caballero anunciou que a Xunta de Goberno aprobará este venres a adxudicación das obras para a rexeneración de Samil no tramo que comprende desde a praia da Fonte ata a zona da pista de patinaxe. O goberno local investirá 1.800.000 euros nun proxecto conxunto co goberno de España que abordará a recuperación da zona de praia e o novo paseo cun importe de 2.126.150 euros.
O Teatro Salesianos acollerá este xoves a Festa de Nadal do Programa de Envellecemento activo “Vigo, cidade amiga dos maiores” coa participación de máis de 600 usuarios. Esta iniciativa municipal ten por obxectivo acompañar aos maiores da cidade para facilitarlles que poidan manter unha vida activa e saudable.
A partir de hoxe queda aberto o prazo de inscrición para que directivos e responsables de equipos de pequenas e medianas empresas de Vigo reciban un curso gratuíto de 140 horas de formación en procesos de dixitalización, destinado a aumentar a competitividade das pemes. Así o anunciou este xoves a terceira tenente de alcalde, Elena Espinosa, ao presentar o proxecto “Vigo dixital pemes”, e avanzar que o obxectivo do goberno municipal é que a cidade “lidere o cambio dixital”.