A decisión do Goberno de España de prohibir a actividade económica non esencial paraliza todas as obras públicas na cidade. Abel Caballero incluíu esta decisión dentro da batalla contra o coronavirus porque “o prioritario é a saúde”.
O alcalde explica que xa lle comunicou por carta ao presidente do goberno autonómico que “todos os dispositivos da cidade” están ao seu dispor para velar pola saúde das 600.000 persoas que conforman a Área Sanitaria de Vigo.
Segundo os datos ofrecidos este luns polo alcalde, 94 persoas foron denunciadas esta fin de semana pola Policía Local por incumprir o Real Decreto de estado de alarma, elevando o total aos 463. Ademais, os Bombeiros desinfectaron as inmediacións dos centros de saúde.
Abel Caballero informou este luns de que o Concello de Vigo xa atendeu a case 1.800 familias para proporcionarlles todo tipo de axudas de emerxencia ante a crise do Covid-19. O valor total é de 145.000 euros.