Abel Caballero informou este xoves de que o Concello de Vigo xa atendeu a máis de 1.700 familias para proporcionarlles todo tipo de axudas de emerxencia ante a crise do Covid-19. Ademais, o servizo de entrega de comidas atende a 400 vivendas ao día e no pavillón do Berbés xa son 30 as persoas acollidas.
A Policía Local impuxo 25 novas sancións este mércores, deixando un total de 323 denuncias desde o 16 de marzo. O alcalde reiterou este xoves que os axentes continuarán garantindo o cumprimento en Vigo do estado de alarma “para garantir a seguridade, para garantir a vida da xente”
Abel Caballero lembrou este xoves o ofrecemento de Contenur, que xa está fabricando colectores específicos para Fátima e Povisa, á espera de que o Sergas estude a proposta municipal. Namentres, os bombeiros incorpóranse ao dispositivo de desinfección das rúas dedicados especialmente a zonas hospitalarias e sanitarias.
Dada a gravidade da situación sanitaria que estamos a atravesar, o rexedor considera “importante e conveniente” a gratuidade do aparcamento do Álvaro Cunqueiro. Así llo solicitou esta mañá á Xunta de Galicia, lembrando que na cidade xa non está a funcionar a Xestión do Estacionamento Regulado.