O alcalde asegurou que entre "finais deste mes e comezos do seguinte" coñecerase o proxecto arquitectónico deseñado polo premio Pritzker Thom Mayne para a nova estación de Urzáiz que acollerá a Alta Velocidade. Caballero apuntou que a mediados do vindeiro ano podería comezar o derrubo da actual terminal ferroviaria para dar comezo ás obras da nova estación.
A Xunta de Goberno Local celebrada este martes aprobou os plans de seguridade e saúde de ambas humanizacións, paso previo ao inicio dos traballos de mellora das rúas. A reforma de Manuel Álvarez suma un investimento de 5,2 millóns de euros e a humanización de Escultor Gregorio Fernández ascende a 1,1 millóns. O goberno local adxudicou asemade o contrato de mantemento dos contedores soterrados da cidade.
O tenente de alcalde, Santi Domínguez, presentou este martes un novo título da colección Os Bolechas van de viaxe centrado na súa visita a Vigo e un puzzle das illas Cíes como instrumentos de promoción da cidade. Santi Domínguez salientou que con estas iniciativas se quere "achegar aos nenos e nenas a nosa cidade levándoos de viaxe".