O departamento de Muller divulgou o II Plan de Acción Municipal para combater a violencia contra as mulleres

Aproveitando a presentación do programa de teleasistencia móbil, o departamento de Muller repartiu entre os medios o documento que recolle o II Plan de Acción Municipal para combater a violencia de xénero 2004-2007. Este plan pretende dar continuidade ao primeiro (2000-2003) aportando recursos de tipo asistencial, asociativo e orientados á participación e integración social das mulleres maltratadas. Así mesmo, desenvólvense distintas accións destinadas á sensibilización social e á educación, coa intención de contribuír ao cambio de mentalidade e actitudes da cidadanía.