A Casa das Artes exhibirá unha das mostras máis ambiciosas da arte contemporánea galega
“CMAG – Vigo” será unha exposición permanente con máis de 70 obras e pezas inéditas de Lugrís, Laxeiro, Berta Cáccamo, Isaac Díaz Pardo ou Sotomayor que se poderán visitar no primeiro andar da Casa das Artes a partir do 12 de xuño.
O alcalde explicou que a mostra reunirá unha selección das obras máis representativas producidas entre a posguerra e o final do século XX. O CMAG - Vigo permitirá ao público descubrir unha das coleccións de arte galega contemporánea máis importantes tanto pola súa extensión como pola calidade das obras que a integran.
A exposición, situada na primeira planta da Casa das Artes, contará con máis de 70 pezas de pintura e escultura e ofrecerá un percorrido pola evolución da creación artística galega ao longo de seis décadas. Caballero destacou que, por primeira vez, o Concello presentará unha sala monográfica dedicada á obra de Urbano Lugrís pertencente á colección municipal.
Entre os fitos da exposición figura tamén a escultura Natureza do vigués Camilo Nogueira que, logo de ser restaurada, volverá exhibirse na cidade. A mostra incorporará ademais A barca espacial, considerada unha das obras mestras de Laxeiro e adquirida polo Concello, unha peza que apenas foi amosada ao público.
O percorrido complétase con Talismanta, da pintora Berta Cáccamo, actualmente en depósito e en proceso de adquisición municipal; unha selección practicamente inédita de obra sobre papel de Isaac Díaz Pardo; e un destacado retrato da última etapa de Fernando Álvarez de Sotomayor, doado ao Concello e nunca antes mostrado ao público.
A exposición estrutúrase seguindo un criterio cronolóxico e temático a través de sete capítulos que permiten comprender a evolución da arte galega contemporánea: Urbano Lugrís, entre o real e o onírico; O academicismo da posguerra; Entre dous exilios: a definición da arte galega; Entre a abstracción e a nova figuración; Novos camiños da figuración; Das mostras da Praza da Princesa ao Grupo Atlántica; e A liberdade expresiva dos noventa.
Caballero informou amais da presenza dunha selección de obras do colectivo Grupo Atlántica, presentada en diálogo co movemento precursor das históricas exposicións da Praza da Princesa, nun percorrido que permitirá coñecer a transformación da creación artística galega desde a posguerra ata as vangardas de finais do século XX.
“Unha exposición que ninguén en Vigo se pode perder”, concluíu.