O Concello inicia en outubro a humanización de Clara Campoamor que mellorará a seguridade peonil
O próximo mes de outubro comezará a humanización da estrada Clara Campoamor, entre as rotondas de Ramiro Pascual e do Hospital Álvaro Cunqueiro. O alcalde apuntou este martes que a obra mellorará a seguridade dos peóns e que debería ser financiada pola Xunta de Galicia por ser a vía de acceso ao hospital.
Abel Caballero explicou hoxe que as obras de humanización da estrada Clara Campoamor, ademais de renovar todas as redes de servizos, conlevarán a creación dunha senda peonil como consecuencia da ampliación da beirarrúa “para que os peóns circulen con seguridade”.
O rexedor lembrou que as obras de mellora do vial deberían ser financiadas pola Xunta de Galicia por tratarse do acceso ao Hospital Álvaro Cunqueiro. “A Xunta que é a que fai o hospital e, por tanto, tería que estar pagando todas estas obras”, afirmou o alcalde ao incidir en que “a Xunta non achega nin un céntimo”.
Caballero asegurou que o Concello continuará coas obras na estrada Clara Campoamor “ata ter todo o traxecto, desde a cidade ata o hospital, suficientemente ben humanizado”.
