A humanización de San Roque ascende a case 2 millóns e estará rematada en 10 meses
Continúa o proceso de humanizacións da cidade e nesta ocasión é a quenda de San Roque. Cun orzamento de preto 2 millóns e un prazo de execución de dez meses, a actuación inclúe a creación dunha nova praza na confluencia con Couto de San Honorato.
Abel Caballero avanzou esta mañá que este mes de setembro comezarán as obras de humanización da rúa San Roque, entre Gregorio Espino e Reiseñor. Cun importe de case 2 millóns de euros e un prazo de execución de 10 meses, a actuación comprende os tramos da rúa San Roque e Couto de San Honorato, situados entre Gregorio Espino e as rúas Colombia e Reiseñor.
O rexedor explicou que se mellorarán 247 metros aumentando a calidade dos espazos dos peóns, asegurando a seguridade da circulación e renovando as redes de servizos. Crearase unha praza nova entre as rúas San Roque e Couto de San Honorato, formando un graderío que envolve a zona verde.
O proxecto contempla o aumento do ancho das beirarrúas, mantén un sentido único de circulación, reserva aparcamento entre a rúa Talude e a Avenida de Gregorio Espino e prevé a renovación de mobiliario urbano, redes de abastecemento, saneamento e alumeado.