A Avenida de Castelao completa a súa pintura artística
A intervención artística de máis de 2 quilómetros de longo forma parte do programa Vigo Cidade de Cor. O alcalde valorou a acción como “unha obra de arte” da que xa pode gozar toda a cidadanía de Vigo.
Abel Caballero visitou a intervención artística no paseo peonil da Avenida de Castelao. Agora esta zona conta cunha pintura desde Praza América ata os volcáns ao completar a fase entre a rúa O Grove e o final da Avenida.
A artista encomendada ao traballo polo Concello foi Vanesa Álvarez, artista gráfica que vive e traballa en Nova York e realiza este tipo de proxectos e intervencións. “Unha obra de arte”, afirmou o rexedor ao ver o resultado final.
Caballero, acompañado da tenente de Alcalde e delegada da Área de Patrimonio Histórico, Carmela Silva, inaugurou o novo paseo pintado do que xa pode gozar a veciñanza de Vigo.
O programa Vigo Cidade de Cor conta cun orzamento para o ano 2025 de 450.000 euros para 11 murais. Vigo ten máis de 190 pinturas e murais repartidos por toda a cidade.
