O Concello recolle datos de mobilidade na Gran Vía para a instalación das ramplas mecánicas
Comezan esta tarde entre as 17 e 18 horas con dúas cámaras e un dron co obxectivo de determinar o sistema e a forma de mobilidade de vehículos nunha hora punta. O alcalde lembrou que o proxecto xa está adxudicado e que o orzamento para unir Praza América e Praza España con elementos mecánicos é de 26 millóns de euros.
Caballero deu conta do avance do proxecto para a instalación de ramplas mecánicas e humanización da Gran Vía, entre Praza América e Praza España. O alcalde explicou que entre as 17 e 18 horas de hoxe haberá unha recollida de datos de mobilidade nesta vía “para determinar o sistema e forma da mobilidade nunha hora punta”. Para esta acción o Concello empregará dúas cámaras e un dron.
Xa este mesmo mes o Concello iniciou os traballos topográficos para cartografar o bulevar e a beirarrúa esquerda de subida. Caballero lembrou que o orzamento para unir Praza América e Praza España mediante ramplas mecánicas é de 26 millóns de euros.
“As ramplas irán polo medio do bulevar, mantendo a estrutura e a vexetación e engadindo máis zonas verdes”, recalcou. Para Caballero “Vigo está a facer unha nova forma de mobilidade mecánica, dun xeito que non ten case ningunha cidade do mundo”.