O Concello inicia a celebración do centenario da doazón do Pazo de Castrelos á cidade
Abel Caballero lembrou este martes o centenario acordo adoptado pola Corporación Municipal presidida por Gregorio Espino polo que o Concello aceptaba a doazón, por parte do Marqués de Alcedo, da “marabilla” do Pazo de Castrelos, “unha das grandes xoias arquitectónicas de Galicia”, para que permanecese “para sempre” para uso e goce da cidadanía.
No acto conmemorativo celebrado hoxe no recibidor central e nos xardíns do Pazo de Castrelos, o alcalde destacou o acordo do Pleno do Concello de Vigo, na sesión extraordinaria celebrada o 12 de marzo de 1925, na que aceptou, por unanimidade, a doazón con todas as cláusulas impostas polo doador. Entre éstas atópabase nomear fillo adoptivo da cidade ao Marqués de Alcedo; realizar unha subscrición popular para erixir no parque un busto do prócer doante como sinal de gratitude e establecer que a finca se denominase “Parque Quiñones de León” e que nunca saira do dominio do Concello. Caballero lembrou que o marqués pediu que o Pazo fose destinado a Museo de Arte e parque.
“Seguiremos honrando a memoria da doazón e dos xenerosos que contribúen coa cidade, e sentindo o enorme orgullo, imperecedoiro na historia de Vigo, do pazo e dos xardíns”, afirmou o alcalde. No acto celebrado este martes participou o Marqués de Valladares, Ignacio Pérez-Blanco, realizando xunto ao rexedor e Carmela Silva unha ofrenda floral ante o busto do Marqués de Alcedo e inaugurando a mostra "Recordos do Marqués de Alcedo", unha exposición de lotes adquiridos polo Concello nunha poxa en Francia, a maioría pezas de interese histórico artístico relacionadas co marqués e o Pazo, entre os que destaca especialmente "Autorretrato de Antonia Bañuelos coas súas fillas", un cadro que a pintora, segunda esposa do marqués, deixou inacabado polo seu falecemento. Estará aberta ata o 15 de xuño.
Historia
O alcalde lembrou que o Pazo de Castrelos era propiedade do fillo do Marqués de Alcedo, Fernando Quiñones de León e Elduayen, Marqués de Mos e Valladares, quen faleceu de gripe no Pazo o 5 de novembro de 1918, sendo enterrado en Pereiró ese mesmo día. No seu testamento reparte os seus bens entre o seu pai, Marqués de Alcedo, e a súa esposa, a británica Maryanne Whyte. Acordaron que o Pazo quedase en usufruto vitalicio para ela.
O Marqués de Alcedo expón a venda do pazo á cidade, facendo unha oferta ao alcalde Gregorio Espino, xa que era coñecedor de que existía na cidade un debate sobre a necesidade de crear un museo. O cambio de venda a doazón prodúcese cando o Marqués de Alcedo solicita un ducado na Corte Española e Gregorio Espino traslada a petición ao rei Alfonso XIII, conseguindo que finalmente se lle concedese o título de Grande de España, previa doazón do espazo.
Programa do centenario
O alcalde indicou que o Concello celebrará o centenario cun extenso programa de actividades culturais no Museo Quiñones de León, así como na Pinacoteca Francisco Fernández del Riego e na Casa das Artes.
O Museo Quiñones de León acollerá máis de 20 actividades. Desde o 19 de setembro terá lugar a exposición: “O Pazo de Castrelos no centenario da súa doazón”, que contará cunha publicación especial.
Están programadas dez visitas teatralizadas de marzo a setembro, durante os domingos pola mañá. O programa inclúe unha xornada sobre xardíns históricos, programda para o venres 14 de marzo, e que está organizada coa Fundación Juana de Vega baixo a denominación: “O Pazo de Castrelos: unha experiencia práctica na xestión e restauración dos xardíns históricos”. Estará conducida por profesores e investigadores en paisaxismo, xardinería e patrimonio artístico e cultural.
Tamén foi organizadas cinco xornadas divulgativas sobre “O Pazo de Castrelos: evolución e transformación dun espazo singular”.
Ademais, haberá vídeo mapping, unha experiencia multimedia sobre a historia do pazo. A música forma parte do programa conmemorativo cun ciclo de concertos no exterior do pazo: “Cen anos de música”. “Verán de cinema sobre a herba” é outra das ofertas culturais, como o “Nadal en Castrelos”, coa recuperación do costume dos marqueses de instalar unha árbore que podía ser visitado polos veciños.
A Pinacoteca Fernández del Riego acollerá dúas exposicións: “Irene Ceballos. Relato verídico da viúva de Policarpo Sanz”, aberta desde finais de abril; e “Concello de Vigo. Cen anos de coleccionismo de Arte Gallego (I)”, a partir de outubro. Na Casa dás Artes haberá dúas exposicións: “Concello de Vigo. Cen anos de coleccionismo de Arte Gallego (II), a partir de outubro, e Luis Torras. O pincel persistente, aberta desde abril a maio”.
O programa tamén conta cunha dimensión didáctica incorporando actividades dirixidas a todos os públicos, como visitas guiadas, itinerarios temáticos, talleres ou xogos de pistas.
