Os bombeiros e policías locais que traballaron en Valencia tras a DANA recibirán o galardón de Vigueses Distinguidos
O alcalde anunciou este martes que os seis bombeiros e os nove policías de Vigo que traballaron en Valencia tras a DANA, o CEO de PROFAND, Enrique García Chillón, e a Coral de María Auxiliadora, recibirán o vindeiro mércores 26 de marzo o galardón de Viguesas e Vigueses Distinguidos.
Abel Caballero explicou hoxe que os bombeiros e policías locais de Vigo que participaron nos labores de recuperación das localidades valencianas afectadas pola DANA recibirán a distinción de Viguesas e Vigueses Distinguidos en recoñecemento pola súa cooperación cos afectados. “Traballaron nunhas circunstancias moi difíciles axudando a quen o perdeu todo e mostrando a solidariedade da cidade de Vigo”, recalcou o rexedor.
No acto do día 26 tamén recibirá a distinción o CEO de Profand, Enrique García Chillón. “Trátase dunha gran empresa pesqueira que conta con 24 barcos, 13 plantas, 3 plantas de acuiculutra, ademais de con presenza en catro continentes e preto de 5.000 empregados repartidos por todo o mundo”, destacou Caballero ao poñer en valor que se trata de “unha gran cadea de valor engadido e a modernidade”.
O alcalde tamén anunciou hoxe que a Coral María Auxiliadora recibirá o recoñecemento da cidade pola actividade desenvolvida durante máis de medio século. “Durante máis de 50 anos foron capaces de desenvolver un repertorio que abarca todo tipo de música”, apuntou o alcalde.
Premiados 2025
Na gala do próximo mércores recibirán as Medallas da Cidade Arvi e Fe Seguros. Entre os galardoados como Viguesas e Vigueses Distinguidos atópanse Iván Martínez, presidente do Banco de Alimentos, a título póstumo; o Consello Municipal da Muller; o xornalista Antonio Mínguez Hermida; Alento, Asociación de Dano Cerebral; o CEIP para Dobrada e a Escola Educación Infantil Vila Laura.
