Caballero: “As ramplas de Paseo de Granada achegarán a Porta do Sol á gran parada de bus do Bicentenario”
O alcalde informou da aprobación do proxecto na Xunta de Goberno Local por un importe de 3.344.461 euros. Instalaranse 4 ramplas cunha lonxitude aproximada de 210 metros.
“Aprobamos o proxecto das ramplas mecánicas do Paseo de Granada”, indicou o rexedor, tras a luz verde da Xunta de Goberno Local á medida. A instalación destas ramplas “é unha fórmula para achegar o centro da cidade, que é a Porta do Sol, á gran parada de autobús do Bicentenario”, continuando os tramos de escaleiras de II República.
Abel Caballero explicou que a inversión elevarase ata os 3.344.461€. Instalaranse 4 ramplas, pola beirarrúa impar, cunha lonxitude aproximada de 210 metros e unha superficie de 3.300 m2, que salvan “pendentes entre o 8,75% e o 10,5%”. O rexedor tamén sinalou que “están preparadas para unha capacidade de tránsito de 6.000 persoas por hora”.
A actuación desenvolverase no Paseo de Granada e unha parte da rúa do Pracer, realizando unha redistribución do espazo a través dunha humanización que terá actuacións como a ampliación do ancho das beirarrúas, a pavimentación acorde coa contorna, a renovación das redes de servizos existentes e da iluminación pública así como a implantación de elementos de mobiliario urbano.
