O temporal require 34 intervencións de Policía e Bombeiros na cidade
O alcalde informou este xoves das incidencias provocadas polo paso da borrasca Aitor por Vigo facendo fincapé na importancia da revisión permanente do arborado.
Segundo explicou o rexedor, desde as 15:00 deste mércores, a Policía Local e os Bombeiros de Vigo realizaron 34 intervencións na cidade: 6 relacionadas con inundacións, 4 en postes e cableados, 1 incendio nunha vivenda, 1 intervención urxente na porta dunha vivenda, 6 actuacións por danos en edificacións e 1 no ascensor dun domicilio.
Das consecuencias do temporal, Caballero salientou a caída de 15 árbores porque “significa que temos que estar atendéndoos permanentemente e vendo cales están deterioradas e son susceptibles de caer nun temporal, porque as árbores teñen un período de vida”, polo que se deben retirar para previr caídas en días de choiva e vento fortes.
En canto ás instalacións deportivas municipais, o temporal provocou deficiencias “menores” que non impediron o desenvolvemento das actividades con normalidade “e hoxe continuará da mesma maneira”.
O alcalde deu conta tamén da actuación dos bombeiros no Halo, onde foi pechado o semicírculo de acceso polo temor a que algúns cristais non aguantaran a forza do temporal, ata que a empresa construtora certificou que “a estrutura e os cristais son resistentes” a temporais fortes.