O goberno local abre a convocatoria para proxectos artísticos expositivos nos museos de Vigo
Ata o 9 de xuño artistas emerxentes e xestores culturais consolidados poderán presentar os seus proxectos artísticos no rexistro do Concello de xeito online. Os seleccionados verán a súa obra exposta en Casa das Artes e Casa Galega da Cultura.
O Concello potenciará a rede municipal de museos coa apertura da convocatoria para proxectos expositivos no Casa das Artes e na Casa Galega da Cultura. O prazo de presentación das obras remata o 9 de xuño.
Segundo informou o alcalde, esta convocatoria faise en réxime de concorrencia competitiva, co obxectivo de dar cabida a novos artistas, dar oportunidades a xestores culturais profesionais e consolidar os espazos museísticos da cidade.
Na convocatoria explícase que a orientación dos proxectos presentados debe xirar en torno á contemporaneidade. Segundo explicou Abel Caballero, isto permitirá reforzar as sinerxías co MARCO e a Fundación Laxeiro, para establecer un amplo espazo de creación, innovación e discusión sobre a arte contemporánea.
A Casa Galega da Cultura e a Casa das Artes serán espazos diferenciados. O primeiro espazo servirá de escaparate para os artistas emerxentes, menores de 35 anos, e que poderán expoñer en calquera das disciplinas relatadas nas bases. Na Casa das Artes haberá exposicións temporais de comisarios, xestores culturais e outros axentes activos profesionais.