O II ciclo de Medio Ambiente e Cambio Climático aborda os lumes e a emerxencia climática
O Concello colabora co Club Peña Trevinca e a Universidade de Vigo na organización do II Ciclo de Montaña Medio Ambiente e cambio climático Cidade de Vigo, que se celebra do 21 ao 23 de marzo no Auditorio municipal.
Na presentación das xornadas, celebradas este martes no Concello, a edil de Medio Ambiente, Nuria Rodríguez, destacou o éxito da primeira edición e agradeceu que o Club Peña Trevinca aceptase a suxestión de que o evento contase cunha presenza destacada de mulleres e desexou “que o segundo ciclo sexa tan prolífico como foi o primeiro e que cada vez teñamos máis público e máis coñecemento”.
A escalada en Alaska, os lumes e a emerxencia climática son os temas nos que se centrará a segunda edición do ciclo programado arredor da celebración o 26 de marzo do Día Mundial do Clima. Tres relatorios, impartidos por mulleres, e a proxección de dous documentais conforman o programa deste ano, que arrancará o martes 21 coa deportista catalá Silvia Vidal, referente da escalada e o alpinismo a nivel mundial, Medalla de ouro da Real Orden do Mérito Deportivo en 2022.
O mércores 22 os incendios centrarán a segunda xornada do ciclo, que comezará coa proxección do corto documental O Son do Courel, ao que seguirá un relatorio da enxeñeira forestal pola UVigo, membro de Adega e experta en lumes forestais, Jenifer Souto.
O día 23 a catedrática en Xeografía pola Universidad de Sevilla e investigadora en cambio climático, Mª Fernanda Pita, será a encargada de pechar o ciclo, que comenzou o ano pasado como unha iniciativa do Club Peña Trevinca Montañeiros de Galicia, co obxectivo de sensibilizar aos socios e socias do club e ao público en xeral na defensa do medio ambiente.
Lois Faro, presidente do Club Peña Trevinca destacou a sensibilidade do club co medio ambiente, que se traduce na realización de diversas actividades ao longo do ano. “Logo de traer o ano pasado a tres homes, decidimos este traer a tres mulleres punteiras, cada unha na súa actividade, co obxectivo de sensibilizar á cidadanía sobre o medio ambiente e o cambio climático para minorizalo o máximo posible”, dixo Faro, que agradeceu a colaboración da UVigo e do Concello. A directora da Oficina de Medio Ambiente da UVigo, Delfina Couce, lembrou as funcións da área que dirixe e as actuacións que desenvolve, como “aforro de recursos enerxéticos, erradicación de invasoras, conservación, etc.”, ao tempo que puxo en valor a colaboración que desde hai anos manteñen co Club Peña Trevinca.
