O Concello reserva 41,6 millóns nas contas do 2022 para investir en máis de 40 actuacións

O alcalde detallou este luns as principais partidas que figurarán no capítulo de investimentos do ano que vén, dentro do orzamento “récord” de 285,5 millóns que ultima o goberno de Vigo. O exercicio de 2022 contempla 41,6 millóns, sen contar, explicou o alcalde, contías que virán de fondos europeos, da Deputación de Pontevedra, do remanente municipal e do Goberno de España. Caballero singularizou máis de corenta obras entre as que se atopan humanizacións, o Vigo Vertical, recintos deportivos ou o novo parque de Bombeiros, entre outras.

Precisamente o alcalde comezou coa nova dotación para o servizo de Bombeiros da cidade, que estará emprazada no entorno de Tomás Alonso, e conta no 2022 cunha partida de 1,3 millóns dun total de 2,8 millóns de euros de investimento. A recuperación dos edificios fronte á Concatedral presentan un orzamento de 1,7 millóns e o Concello anota 190.000 euros para comezar cos proxectos e primeira fase do novo acceso a Navia, unha obra de case 6,2 millóns para dotar ao barrio dunha nova conexión peonil á altura da rotonda da VG20. Para Navia tamén se contempla o inicio da humanización da rúa Teixugueiras con 750.000 euros, a metade do estimado para completala.

Case seis millóns de euros figuran para o elevador que unirá García Barbón coa Vía Norte, unindo Serafín Avendaño coa praza superior do Vialia. Ademais, o goberno de Vigo reserva 700.000 euros para a humanización dun tramo da Avenida de Castelao, desde a rotonda do barco ata Darío Durán, e outros 900.000 euros para a remodelación da San Roque, desde Gregorio Espino ata Ruiseñor. O importe total de ambas reformas ascende a 1,5 millóns de euros.

As contas para 2022 recollen un plan para humanizacións en barrios dotado de medio millóns de euros, a última fase da mellora de Martínez Garrido con 715.000 euros e a primeira do novo paseo litoral de Bouzas, obra cuxo orzamento total suma 3,75 millóns dos que 2.355.000 xa aparecen consignados para o ano que vén.

Entre as contías máis amplas dos investimentos do próximo ano están os 800.000 euros do novo parque infantil da rúa Coruña, a primeira fase da recuperación do sistema dunar de Samil con 2.130.000 (o total do proxecto supera os 4,5 millóns) ou os 600.000 euros da musealización da fortaleza do monte de O Castro. Tamén destacan os máis de 4,5 millóns para as obras do estadio municipal de Balaídos e os 1.860.000 euros da Via Verde, a senda peonil e ciclista sobre a antiga vía do tren, ambas en execución.

Abel Caballero tamén citou a segunda fase das ramplas mecánicas da Gran Vía, con 3.145.000 euros para o tramo desde Venezuela ata a Praza de España, a continuación da peonalización e soterramento do tráfico na Porta do Sol con 4.161.000 euros e tres actuacións no marco do Vigo Vertical: a unión da Travesía de Vigo coa rúa Aragón (646.000 euros en 2022), a conexión entre Marqués de Valterra e Torrecedeira a través de Juan Ramón Jiménez (900.000 euros dun total de 1.240.000 previstos) e a subida desde Romil ata a Avenida da Hispanidade (con 958.000 euros).

A continuación do carril bici na Avenida de Europa presenta un orzamento total de 2 millóns de euros, dos que 200.000 están consignados no 2022 para iniciar este proxecto. Para a humanización do Calexón de Balado -á altura da asociación veciñal Fonte do Galo sita en Rosalía de Castro- figuran 200.000 euros, outros 250.000 (a metade do total previsto) para a mellora da rúa Lorient e 300.000 euros máis para construír un aparcamento en Matamá.

O Concello prevé igualmente humanizar a rúa Lepanto e asigna 100.000 euros para comezala no 2022, para completala no seguinte exercicio chegando aos 850.000 euros en total. O goberno de Vigo tamén humanizará o entorno do estadio de Balaídos con medio millón de euros dos que 100.000 xa aparecen no orzamento municipal do próximo ano. Outras partidas detalladas este luns por Abel Caballero foron o inicio da obra de acceso ao colexio Párroco don Camilo (100.000 euros do medio millón total no que se estima a reforma), 150.000 euros para mellorar a eficiencia enerxética dos edificios, 80.000 para as instalacións deportivas nos parques, 100.000 euros para accións nas zonas verdes e parques públicos, outros 200.000 euros para parques infantís e biosaudables e 400.000 euros máis para unha nova iluminación no monte de A Guía.

O Concello prevé continuar no ano que vén coa cobertura dos patios dos colexios da cidade e reserva ao efecto 322.000 euros. Caballero anunciou unha partida de 150.000 euros para modernizar o mercado de Teis (o orzamento total estimado ascende a 300.000 euros), outra consignación de 250.000 para mupis dixitais (un terzo do custo total) e outros 80.000 euros para mellorar as oficias municipais de distrito do Concello.

No eido deportivo, xunto ao estadio de Balaídos, o goberno de Vigo arrancará o ano próximo con 50.000 euros os traballos previos para a construción do novo pavillón de Matamá, que rozará os tres millóns de investimento. Os proxectos e primeiros pasos da reforma das pistas de atletismo de Balaídos (que custará uns 2,7 millóns) se afrontarán cos 200.000 euros que inclúen as contas de 2022 e, por outra banda, Abel Caballero anunciou este luns a elaboración dun proxecto para actuar sobre o campo de fútbol de Barreiro, para o que se anotan 100.000 euros no orzamento de 2022. Ademais, o ano que vén comezará a actuación sobre o pavillón do Carballal con 75.000 euros (o total supera o millón) e se reservan outros 300.000 euros para mellorar as instalacións deportivas existentes na cidade.