Caballero pide maior presenza municipal nos órganos de decisión da Cooperación Internacional para o Desenvolvemento

O presidente da FEMP, Abel Caballero, dixo no Congreso dos Deputados que “é moi importante o reforzamento dos Gobernos Locais na Cooperación Internacional” e por iso, ante os membros da Comisión de Cooperación Internacional para o Desenvolvemento, o rexedor olívico pediu maior presenza das Entidades Locais nos órganos de decisión da Cooperación para o Desenvolvemento, así como a creación dunha Comisión Sectorial sobre esta cuestión na que a Federación conte con voz e voto.

Na súa intervención para informar sobre o obxecto da Subcomisión para o estudo da actualización do marco normativo e do sistema de Cooperación Internacional para o Desenvolvemento, o presidente da FEMP defendeu o traballo dos Gobernos Locais e pediu que a nova normativa teña en conta os contidos da Axenda 2030, os seus Obxectivos de Desenvolvemento Sostible e tamén as cuestións derivadas da pandemia.

A xuízo de Abel Caballero, para os Gobernos Locais é moi importante estar na elaboración da lei a través do consenso, “dunha forma máis dialogada”. E tamén o é que a norma reforce o papel das Entidades Locais na cooperación porque “a participación en cooperación internacional reforza a acción local e a cohesión nos municipios porque os cidadáns queren cooperación. E isto non está fóra do noso ámbito de actuación” salientou.

O sistema de cooperación e a súa reforma debe romper a idea de que a cooperación recae exclusivamente no Estado e nas comunidades autónomas, explicou. Para Caballero “ese modelo está superado, xa existen outras ideas que se poden levar adiante. Os concellos temos entidade e capacidade para contribuír na valoración xeral e na valoración do concreto, e no ámbito dos nosos recursos”.