O alcalde salienta a “imprescindible” rehabilitación da carroza do Cristo da Victoria
O Concello investiu 32.670 euros na recuperación integral desta “parte do patrimonio da cidade” que estaba moi deteriorada, segundo explicou o alcalde logo de coñecer o traballo realizado na estrutura externa e interna e que permitirá que a carroza estea “preparada para 150 anos máis”.
Abel Caballero realizou unha visita este martes á Basílica de Santa María para coñecer o traballo realizado no carro do Santísimo Cristo da Vitoria na que participaron o Bispo da Diocese Tui-Vigo, Luis Quinteiro Fiúza, o deán da Colexiata, a presidenta da Confraría do Santísimo Cristo da Vitoria, Marora Martín Caloto, e o secretario, Carlos Borrás.
O rexedor puxo en valor a restauración realizada, obra dun artesán de Lavadores e que era “imprescindible” e “urxentísima” dado o estado de deterioro no que se atopaba o carro, que comprometía a estabilidade do conxunto. Agora está “preparado para aguantar 150 anos máis”, engadiu.
O goberno municipal dedicou 32.670 euros á rehabilitación da carroza que é “parte do patrimonio da cidade”. Foi deseñada en 1953 para poder alongar o percorrido da procesión do Cristo e aliviar a carga dos costeleiros e, dende ese momento, pasou a ser un atractivo en si mesma.
Segundo explicou Caballero, o paso do tempo prexudicou a estrutura interna e externa do carro, as madeiras orixinais, que foran substituídas por piñeiro, estaban comidas e deterioradas, o armazón de ferro tiña óxido, as rodas eran inservibles e o sistema de freos estaba danado. O Concello financiou as actuacións realizadas: recuperación das madeiras nobres de castiñeiro, os adornos de prata e nácar substituíndo os inservibles, recuperando cores e dourados orixinais. Amais renovouse a estrutura metálica para dotar de estabilidade o carro, novas rodas e sistema de freado, novo sistema eléctrico…
Para o alcalde, Vigo é unha “cidade moi rica en patrimonio histórico e moi rica en arquitectura eclesiástica e queremos seguir apoiando á cidade”. A recuperación da carroza do Cristo forma parte do convenio asinado o ano pasado co Bispado para o mantemento, conservación, restauración, difusión e divulgación do patrimonio cultural de titularidade eclesiástica da cidade en virtude do cal están acometéndose actuacións nos adros das igrexas de Candeán e Santo Tomé de Freixeiro e no palco do adro de Santa Mariña de Cabral.
