O goberno de Vigo estuda un novo aprazamento no pago dos impostos municipais

En sesión plenaria, Abel Caballero detallou este xoves as decisións adoptadas polo Concello fronte ao coronavirus, no marco do comité de seguimento, facendo especial fincapé no traballo de prevención, de desinfección e de cobertura social.

Como novidade, e no relativo aos impostos, o alcalde manifestou que “non descarto en absoluto unha nova prórroga” nos prazos de pago, que será valorada no comité de seguimento municipal, despois de que o goberno vigués aprazara os abonos de circulación, ICIO, plusvalía e se pararon os prazos dos recursos.

Segundo expuxo o alcalde, o Concello comezou as medidas o 11 de marzo, antes do estado de alarma decretado o 14, suspendendo a Gala do Deporte. Ao día seguinte constituíu o comité de seguimento e empezaron as resolucións cancelando actos públicos, pechando instalacións municipais non esenciais e deportivas, cerrando parques infantís, pistas deportivas, mercadiños, espazos públicos e praias, ao que seguiu o aprazamento da Festa da Reconquista.

Xa en estado de alarma, o Concello reduciu toda a presencia de traballadores non esenciais no Concello, pechou as escolas infantís municipais e o resto de centros educativos do Concello, e mantivo operativos os 252 policías locais en activo, como persoal imprescindible, ademais dos Bombeiros (encargados tamén da desinfección) e de Protección Civil. Caballero salientou a función da Policía Local na concienciación cidadá, a través de controis, advertencias e denuncias, máis de mil neste mes.

A limpeza tamén quedou como servizo esencial, cun funcionamento “extraordinariamente intensivo”, valorou Caballero, con 14 equipos de desinfección en quendas de mañá, tarde e noite, atención especial ás contornas dos centros sanitarios e espazos de afluencia. Tamén se acomete a desinfección de decenas de quilómetros de rúas cada día e nos lugares de maior presencia nas parroquias viguesas.

No transporte urbano, o goberno vigués decidiu desincentivar o uso do autobús, que quedou no 8% da súa cobertura habitual, e intensificou o mantemento da distancia de seguridade entre os viaxeiros. Nas liñas ao Álvaro Cunqueiro, un vehículo “eiruga” presta o servizo seguido doutro de tamaño normal, para garantir as distancias. Caballero tamén citou a suspensión do pago en efectivo para evitar o intercambio de moedas e as aglomeracións no acceso ao vehículo. Xunto aos taxistas, que tamén adoptaron medidas contra o coronavirus, o alcalde agradeceu o traballo dos condutores e condutoras.

Posteriormente foi suspendida a “zona azul”, logo de observar durante tres días como funcionaba o sistema de rotación no estado de alarma. Ao comprobarse que a rotación era reducida, o goberno de Vigo decidiu suspender o pago da XER. Ademais, Abel Caballero explicou que se reforzou o persoal dos cemiterios con ata catorce sepultureiros e se controlou o aforo nos enterros.

Sobre a auga, o alcalde citou a orde de prohibir a Aqualia cortar o subministro a ningunha familia sen que antes o Concello saiba da súa situación económica. Tamén se decidiu o precinto das fontes públicas por prevención.

Caballero trasladou que se reforzou nun 50% o persoal que atende o teléfono municipal 010, en boa parte traballando desde o seu domicilio e prestando atención incluso nas fins de semana. A web municipal recibiu nun mes 105.000 visitas e a “app Vigo”, 19.000 usuarios. Ademais, o Concello mantén accións culturais en remoto no MARCO e na biblioteca Neira Vilas, entre outras; Máis que Auga conta cun Plan Saúde con 27.000 usuarios telemáticos e funciona unha oficina municipal de información e asesoramento a PEMES e autónomos sobre o coronavirus.

Amais, o Concello está mantendo os postos de traballo e os salarios do persoal en todas as escolas infantís municipais, na aula de estudo de Navia e na Escola Municipal de Artes e Oficios, segundo detallou Caballero. Tamén recordou que se suspendeu o pago das cotas ás familias mentres non se presten estes servizos.

Social
O Concello canalizou a solidariedade a través do voluntariado municipal, que congregou a mil persoas en sete días e prestan atención telefónica en función de cada perfil, segundo detallou Caballero.

O alcalde explicou que o goberno vigués adiantou recursos a 2.050 familias beneficiarias dunha axuda de comedor escolar municipal e proporciona 550 menús diarios a familias que o precisan. O Concello tamén reforzou a teleasistencia, con ata tres chamadas diarias aos usuarios.

Nesta “atención moi importante ás persoas vulnerables”, Caballero puxo énfase nas persoas sen fogar. Recordou que o Concello ten un albergue municipal en Marqués de Valterra e conta con outras 40 prazas en convenio coa Fundación Santa Cruz. Na detección de persoas sen teito durante o estado de alarma contactouse con unhas 150, co que o Concello habilitou habitacións en cinco hoteis da cidade e logo dispuxo o pavillón do Berbés para acollelos. De ser preciso, “en doce horas” o goberno de Vigo está en disposición de abrir un segundo recinto deportivo, aínda que polo de agora os recursos dispoñibles están sendo suficientes, cunhas 15 prazas aínda vacantes.

O Concello intensificou a concesión de axudas de emerxencia, con 3.671 outorgadas desde o inicio e “sen límite orzamentario para esta partida”. Caballero explicou que se detectaron casos de familias con emprego e salarios que, polos tempos de tramitación dos ERTES, están sen liquidez e teñen que solicitar asistencia social municipal, cuestión que puxo en coñecemento do Goberno de España.

Por outra banda, a administración local repartiu neste tempo 750 novas tarxetas tipo bancarias para a compra de alimentos e anotou que o Concello mantén o sistema de axuda a domicilio dando altas de inmediato e sen comprobación previa, e tamén leva comida ás casas de persoas enfermas de coronavirus que o necesitan. Por outro lado, e de media, o Concello entrega ademais uns 600 menús diarios nos domicilios das persoas que habitualmente facían uso dos comedores sociais.

O goberno de Vigo tamén habilitou 16 habitacións individuais con baño no Seminario da Avenida de Madrid, para atender a persoas sen fogar enfermas de coronavirus derivadas polo Sergas. Para posibles positivos entre as persoas sen teito acollidas nos distintos espazos municipais, o Concello ten un convenio coa Cruz Vermella para ser atendidas.

Por último, Abel Caballero asegurou que a administración que preside mantén unha “vixilancia permanente” sobre a violencia machista, con atención as 24 horas do día, co centro de atención integral en funcionamento e prestando atención psicolóxica e xurídica, entre outras.