O Pleno da Corporación tomou coñecemento este mércores da liquidación do orzamento municipal de 2015, que arroxa indicadores positivos e consolida a Vigo como a cidade coas finanzas máis sólidas de España, en verbas do edil de Facenda. Jaime Aneiros subliñou a execución do 90% do orzamento, a débeda cero do Concello e o pago a provedores nun prazo de dez días.
A Corporación Municipal aprobou na sesión deste mércores dúas modificacións de crédito: unha para amortizar 7 millóns de débeda municipal con cargo ao superávit e outra para facer fronte a investimentos en humanizacións e nas obras da grada de río do Estadio de Balaídos por unha contía total de 7.100.000 euros, empregando unha parte do remanente da liquidación dos orzamentos de 2015.
Os votos do PSOE e Marea deron luz verde a unha moción solicialista na que se insta á Xunta a que inclúa na modificación de Lei de Área Metropolitana o tratamento de Vigo como capital de provincia. Tal e como defendeu o concelleiro Carlos López Font, esta inclusión foi un dos acordos acadados durante as reunións cara á modificación desta norma.
Os votos do goberno de Vigo validaron este mércores a aprobación inicial do novo regulamento do Pleno, un texto que inclúe 8 das 23 emendas presentadas pola oposición e que conta cun consenso do 90%. Carlos Font valorou un documento "máis democrático", máis transparente e que facilita o acceso á información.
A Corporación Municipal aprobou este mércores unha declaración institucional na que amosa a súa desaprobación ao acordo acadado entre os Xefes de Estado e do Goberno da Unión Europea con Turquía que contempla a devolución a este país de todos os emigrantes, incluídos os demandantes de asilo sirios.
Nesta 25ª edición daránse cita no recinto feiral do IFEVI, do 2 ao 10 de abril, un total de 48 marcas de coches e motos que o converten no terceiro máis importante de España. O segundo tenente de alcalde, David Regades, participou este mércores na presentación.
O 27 de marzo celebrouse en todo o mundo o "Día Mundial do Teatro". Con tal motivo, a Escola Municipal de Teatro de Vigo organiza un acto que terá lugar o xoves 31 de marzo, ás 19:00 horas, no auditorio do Concello de Vigo, e consistirá nunha mostra de diversas escenas representadas por alumnos/as da Escola.
O Museo Liste convoca o III Concurso de Fotografía co que se pretende fomentar o coñecemento e a creatividade a través da práctica da fotografía co fin de destacar variados aspectos históricos e etnográficos da nosa cidade. "Vigo: símbolos da cidade" é o tema elixido para este ano coa intención de recoller aqueles símbolos que os cidadáns consideran representativos da cidade olívica. Prazo de admisión das obras ata o 3 de maio de 2016 ás 14:00 h.