O ungüentario volta a Vigo e pasa a formar parte da sección de Arqueoloxía do Museo do Mar

"Hoxe é un día moi importante na cidade", salientou Abel Caballero, quen subliñou a relevancia arqueolóxica da peza, "porque forma parte da historia da cidade", e agradeceu a sensibilidade amosada pola conselleira de Cultura e a súa disposición "ao traer a Vigo o ungüentario nas mellores condicións posibles". Neste mesmo sentido expresouse Santi Domínguez, quen asegurou que desde o primeiro momento dende a Consellería de Cultura se manifestara a intención de que o ungüentario fora exposto en Vigo para poder ser contemplado polos vigueses e viguesas. Ámbolos dous coincidiron ao sinalar que hoxe se demostra que houbo un intento de manter una polémica "estéril" e "artificial". Ao respecto, Ánxela Bugallo, tras agradecer as palabras dos representantes municipais, sinalou que "sempre houbo o compromiso de trasladar a peza á cidade despois de ter feito os traballos de documentación pertinentes e de acondicionar o espazo expositor". A conselleira de Cultura engadíu que con seu depósito en Vigo dase cumprimento ao solicitado polo Parlamento, logo de que o goberno do PP trasladara en 2004 a peza ao Museo das Peregrinacións, en Santiago de Compostela.

O ungüentario é unha peza cerámica procedente da rexión de Palestina, probablemente do século VI ou VII, e chegou a Vigo procedente do mar, polo que insírese no contexto das primeiras etapas da historia da cidade. Ten unha dimensión de 15,5 centímetros de longo conservado e 5 centímetros de diámetro exterior máximo, cunha banda de engobe arrubiado na parte superior e un selo impreso polo exterior e cerca do fondo da peza, cunha áncora con brazos en cruz. Segundo o director xeral de Patrimonio, este último elemento e a propia forma da peza permite asociala a un tipo de cerámica de época paleocristiá tardía. A súa función é a de servir de contedor de ungüentos, de augas ou aceites considerados sagrados.

A súa presenza nun dos xacementos urbanos do Vigo actual explícase pola súa relación co tráfico e co comercio marítimo que esta cidade tivo na época galaico-romana, vinculado a súa vez ás explotacións pesqueiras e de salgado que nos últimos anos se veñen documentando en toda a banda do Areal. Xunto cos restos do poboado prerromano aparecido na Punta do Muíño e co futuro Centro de Arqueoloxía Subacuática que se erixirá lindeiro co propio Museo do Mar, o ungüentario é un elemento fundamental dos contidos de carácter arqueolóxico do centro para explicar a relación da cidade co mar.