A nova grada de Gol comeza a vestir a “pel azul” na conexión con Río
En paralelo, continúa a instalación dos tramos da estrutura metálica que sostén a cuberta na metade máis próxima a Tribuna. O Concello mantén o remate da obra para finais de 2026 e traballa para tratar de poñela en funcionamento a comezos de xaneiro.
As obras da nova bancada de Gol de Balaídos avanzan cun novo fito visible, a colocación das láminas da envolvente azul na zona de conexión coa grada de Río. Abel Caballero informou este venres dun novo avance na construción da bancada de Gol, tres días despois de que a estrutura de formigón alcanzase a súa altura máxima, sinalando que “onte xa iniciamos a colocación das láminas que compoñen a pel azul que recobre a bancada da conexión con Río”. A instalación comezou na zona lateral máis próxima a Río, onde xa pode apreciarse o acabado exterior que irá estendéndose progresivamente polo resto da estrutura.
Nos próximos días continuará a colocación destas láminas mentres avanzan os traballos estruturais na outra metade da bancada. En paralelo, a obra segue coa elevación e instalación dos módulos da malla metálica que sostén a futura cuberta, agora na zona máis próxima a Tribuna. Esta estrutura está composta por diferentes tramos que se veñen instalando desde finais de xullo e que conformarán o soporte da cuberta definitiva de Gol. “Imos instalar máis tramos de malla que van soster a cuberta. E esta obra xa pronto vai ter a cor do resto da obra en toda a parte vertical, de forma moi rápida xa se vai ver todo coa cor de pel azul”, avanzou o rexedor.
O calendario municipal mantén o remate da bancada a finais de 2026, coa previsión de que poida entrar en funcionamento a comezos de 2027. O Concello e o Real Club Celta tratarán de acelerar ao máximo os traballos para poder dispoñer do novo espazo no primeiro partido do ano. “Seguimos querendo e buscando que o 2 e o 3 de xaneiro o campo estea en disposición de utilizar as catro bancadas”, afirmou Caballero. Nesa fin de semana está previsto o regreso do derbi galego a Balaídos, aínda que o Concello advirte da complexidade de axustar a finalización e posta en servizo da nova estrutura a esa data.
A nova grada de Gol contará con máis de 7.000 localidades e elevará a capacidade total de Balaídos por riba dos 31.000 espectadores. Co seu remate estarán completadas tres das bancadas definitivas do estadio: Río, Marcador e Gol. En paralelo, continúan as actuacións vinculadas á futura transformación de Tribuna, coa obra física de retranqueo dos colectores de saneamento xa en execución. A ampliación desta última bancada forma parte da transformación prevista de Balaídos para que o estadio poida optar a acoller encontros do Mundial de fútbol de 2030.
