Zona Franca valora o impacto económico de O Marisquiño e renova o seu compromiso co festival
David Regades e o director do festival Carlos Domínguez “Piti” selaron o apoio ao evento coa presencia do alcalde de Vigo, Abel Caballero. Do 6 ao 9 de agosto, máis de 150.000 persoas participarán na 26ª edición deste certame de deporte urbano.
O Consorcio da Zona Franca de Vigo reafirmou este mércores o seu compromiso de apoio ao festival de O Marisquiño, nun acto no que participaron o alcalde, Abel Caballero, e o responsable do festival, Carlos Domínguez 'Piti', ademais de David Regades. Durante a presentación, o alcalde destacou que este festival "é un fito" na cidade, converténdose no principal evento do deporte e da cultura urbana que, ademais, é gratuíto. Lembrou que está financiado "practicamente na súa totalidade" polo Concello de Vigo, con máis de 1,3 millóns de euros na presente edición.
O delegado de Zona Franca lembrou que patrocinar o descenso urbano, un dos eventos máis espectaculares do evento, supón dar "apoio á economía do lecer, o tempo libre e a cultura". Pola súa banda, Carlos Domínguez destacou que este patrocinio permitiu completar a carreira no Centro Comercial A Laxe, o que fixo máis atractivo o descenso. Segundo sinalou, O Marisquiño ten o reto de incluír cada ano novidades para "sorprender" ao seu público.
