Vigo recibiu 260.662 visitantes nos dez primeiros meses de 2025
O alcalde valorou este mércores os datos turísticos do Instituto Nacional de Estatística que sitúan a Vigo como “a cidade de Galicia que nos dez primeiros meses de 2025 tivo máis turistas estranxeiros”.
O turismo internacional creceu en Vigo un 10,5% no período comprendido entre xaneiro e outubro de 2025 segundo os datos do INE, que sinalan que a cidade recibiu 260.662 visitantes nos dez primeiros meses do ano pasado. Isto son 24.826 turistas máis ca no mesmo período de 2024, cando estiveron na cidade 235.836 visitantes.
“O INE sitúa a Vigo como a cidade turística máis significativa e máis relevante en turismo estranxeiro nos dez primeiros meses do ano”, apunta o rexedor, sendo agosto e febreiro os meses de maior incremento das visitas. Así, en agosto, a cifra de visitantes foráneos superou os 42.000, o que supón un crecemento dun 30,7% respecto ao 2024, dobrando a cifra de Santiago e A Coruña.
Tal e como apuntou Caballero, entre xaneiro e outro de 2025, Vigo recibiu 260.662 visitantes, mentres A Coruña recibiu 154.304 e Santiago 180.167. “Case temos os mesmos turistas estranxeiros que Santiago e A Coruña xuntos. Estamos nun niveis de turismo excepcionais e toda a promoción faina o Concello. O resultado é este: somos a cidade de Galicia que nos dez primeiros meses de 2025 tivo máis turistas estranxeiros”.