O prazo de inscrición no programa Vigo Inclusivo está aberto ata o 12 de decembro. O campamento desenvólvese os días 22, 23, 26, 29 e 30 de decembro no Verbum de 9 a 14 horas. Caballero tamén informou de que o próximo ano o circuíto Run Run Vigo incluirá a carreira Vigo Contra o Cancro coa cooperación activa de AECC.
O rexedor destacou, tras a elevada ocupación da fin de semana, que “seguimos sendo a gran cidade do Nadal de España” na que “temos un número elevadísimo de visitantes dos nosos irmáns portugueses”.
O alcalde avanzou o seu apoio á manifestación que o próximo xoves 4 partirá ás 19,00 h de Praza España. Convocada por SOS Sanidade Pública baixo o lema “Reconstruír a área sanitaria”, esta marcha denunciará, en verbas de Caballero a “deficiente” situación que atravesa a sanidade en Vigo con falta de medios, persoal e organización, a pesar de que os e as profesionais fan un traballo “excepcional”.
O alcalde felicitou ás autoras dunha revista que mostra os canons de beleza impostos ás mulleres en diferentes momentos da historia desde un enfoque de xénero. Esta publicación foi elaborada por tres alumnas do IES de Coruxo.