O alcalde, que recomendou novamente “prudencia, sentido común e precaución” contra o coronavirus, insistiu en solicitar á Xunta información diaria por municipios e non só por áreas sanitarias, e amosou os exemplos de Portugal, Andalucía, Cataluña, Aragón, Estremadura, Castela e León, Asturias, Murcia ou Canarias para reclamar o mesmo en Galicia.
O alcalde visitou este martes o edificio do antigo centro de saúde, cedido polo Goberno de España ao Concello, que o reconverterá nunha biblioteca dun centenar de prazas. Cun orzamento de 900.000 euros, o Concello calcula que comezará a construción o ano que vén para inaugurala no 2022.
A Federación Olívica de Pais e Nais de Alumnos retomou este luns 19 de outubro o comedor en cinco centros educativos coa previsión de que o vindeiro 2 de novembro estea en funcionamento en tódolos colexios asociados. Caballero agradece o “traballo e esforzo” que realizan as nais e pais e a comunidade educativa nestes momentos.
O alcalde reclamou á Xunta que aumente a dotación económica do bono de alimentos, unha prestación que, na súa opinión, debería ser indefinida, como sucede no Concello de Vigo. Este servizo, coñecido en Vigo como tarxeta da dignidade leva operativa case dez anos.