Caballero visitou hoxe luns os traballos de construción da pista de skateboard de Barreiro, en Lavadores, onde inviste 45.000 euros. Ademais, o alcalde estimou que se licitará esta semana a gran pista no parque de Navia, cun orzamento de 300.000 euros. A terceira será a remodelación da existente no Castro, pendente da autorización da Xunta.
O rexedor avanzou esta mañá o desbloqueo "pola vía dos feitos" dunha parte moi importante do urbanismo da cidade, acolléndose á tramitación da Lei 2/2017. Concretamente, solicitarase a recuperación da ordenación do Plan do 2008 para os ámbito terciario de Recaré, así como para todo o solo urbano consolidado ademais de para ámbitos do Porto de Vigo, de Canido e do aeroporto e para solos urbanos non consolidados que están en avanzado estado de desenvolvemento como é o caso de Esturáns ou Tomás Paredes.
Segundo informou o alcalde, o goberno local xa iniciou a elaboración do novo mapa forestal de Vigo, o deseño da "interacción" entre os montes e a zona urbana para os próximos cen anos. O Concello prevé a plantación de especies autóctonas frondosas, cunha maior resistencia ao lume, que actúen como barreira natural. <br />
"Continuamos co ritmo imparable de humanizacións" apunta o rexedor, neste caso, nas parroquias onde se están acometendo obras de substitución de firmes que se completarán nas próximas semanas.
O alcalde lembrou a importancia da temática deste obradoiro chamado "Empleo digital", que xorde tras o convenio asinado polo goberno local coa Fundación Telefónica.