Abel Caballero entrevistouse este luns, na súa primeira reunión do 2010, coa Asociación de Familiares de Enfermos de Alzheimer, entidade que estuda conxuntamente co Concello a ubicación dun centro integral para os pacientes e familiares desta enfermidade. O alcalde mostroulles o seu "apoio absoluto" para crear en Vigo o centro "referencial" de Galicia da atención ao Alzheimer.
O tenente de alcalde, Santi Domínguez, e o concelleiro de Cultura, Xesus López, suprevisaron hoxe os últimos preparativos da montaxe das carrozas que transportarán as Súas Maxestades os Reis Magos mañá polas rúas da cidade. A cabalgata deste ano, que ten como temática a celebración do Bicentenario da cidade, estará integrada por 13 carrozas e outros 19 grupos de animación e acompañamento.
Tras entrevistarse coa Asociación A Golpe de Pedal, o alcalde avanzou que o futuro pasillo verde que substituirá ás actuais vías do tren incorporará carril bici. A excavación do túnel do acceso ferroviario desde Redondela ata a estación de Urzáiz permitirá levantar as vías e habilitar alí un amplo espazo verde. Ademais, Caballero informou á entidade do proxecto a medio plazo de instalar carril bici no eixo Travesas-Samil-Coruxo.
As entradas para a Supercopa de España de fútbol sala, que se disputará os vindeiros días 7 e 8 de este mes (xoves e venres) no pavillón central do IMD das Travesas, poranse á venda esta mesma tarde nos despachos de billetes do complexo deportivo municipal vigués. A organización fixou uns prezos populares de 6 euros para a xornada de semifinais e de 10€ para a final. Ademais, o abono para ver as dúas xornadas será de 12€. Os menores de 15 anos poden entrar de balde presentando o DNI ou documento acreditativo da idade ata completar aforo.