Santi Domínguez inicia a lectura ininterrompida de textos da plataforma "Queremos galego"

Un poema do poeta Fiz de Vergara e un escrito de Castelao foron os textos elixidos polo tenente de alcalde, Santi Domínguez, para iniciar hoxe a lectura ininterrompida proposta pola plataforma Queremos galego, baixo o lema "Lendo polo galego". "É unha honra estar hoxe aquí con tanta xente boa e xenerosa", salientou o concelleiro tras a lectura dos textos.

Nova edición dos cursos de educación viaria para escolares da Policía Local

Abel Caballero acudiu este mércores ao Colexio Escolas Nieto para presenciar o inicio dos cursos de Educación Viaria que imparte a Policía Local a máis de 16.000 escolares de primaria. O alcalde destacou o "coñecemento elevado" das normas de tráfico mostrado polos nenos e non desbotou a posibilidade de incrementar ata 20.000 os estudantes participantes en futuras edicións.

• Cultura

A Semana de Teatro Afeccionado celebrarase no SCD Atlántida de Matamá do 15 ao 18 de outubro

O concelleiro de Cultura, Xesus López, anunciou hoxe que mañá dará comezo a quinta edición da Semana de Teatro Afeccionado da Agrupación de Centros Deportivos e Culturais, que terá lugar no SCD Atlántida de Matamá ás 20.30 horas, de entrada gratuíta. O edil explicou que o programa, que inclúe catro representacións, comezará coa interpretación de "Infinitas posibilidades" a cargo da compañía Lareira Teatro.

• Normalización Lingüística

Comezo do programa "Unha lección de cine", con sete películas en galego dirixidas a estudantes de secundaria

A concelleira de Normalización Lingüística, Iolanda Veloso, anunciou que o xoves, 15 de outubro, comezará unha nova edición do programa "Unha lección de cine", dirixida a alumnos e alumnas de secundaria. Na presentación da iniciativa, na que tamén participou o xerente dos cines Yelmo-Cineplex do Centro Comercial Travesía, Xabier Roibas, a edil destacou que esta convocatoria "pretente amosar aos rapaces e rapazas a posibilidade de ver cine comercial en galego".