Técnicos do Ministerio visitarán a actual sede da Escola de Artes e Oficios para comprobar a súa viabilidade. O alcalde asegurou que esta é "a mellor ubicación posible" para a Biblioteca pois creará "un gran bloque cultural no centro da cidade", e garante que a Escola mellorará as súas condicións actuais na súa nova localización, tamén céntrica.
O alcalde visitou este luns os traballos de formación profesional que teñen lugar na actual sede da Fundación Laboral. A dirección da entidade solicitou a Abel Caballero 10.000 metros cadrados para poder construir a nova sede, que financiaría a Seguridade Social, para o que o Concello fará "todo o posible", segundo asegurou o rexedor.
A concelleira de Patrimonio Histórico, Elena Maure, anunciou este luns a súa renuncia ao cargo "por motivos profesionais". Así o manifestou nunha rolda de prensa conxunta co tenente de alcalde, Santi Domínguez, quen salientou o traballo que a edil nacionalista ten desenvolvido nestes case dous anos de lexislatura e os diferentes proxectos postos en marcha.
A Concellería de Xuventude propón a actividade "Acerta coa ilustración" co gallo da celebración do Día Internacional da Información Xuvenil, o vindeiro 17 de abril. O obxectivo da iniciativa, dirixida a mozos e mozas de 15 a 30 anos de idade, consiste en dar a coñecer á mocidade as propostas que ofrece a Concellería de Xuventude mediante a resposta á pregunta "A que edificio pertence e, en que rúa está a ilustración proposta?".