Vigo abre unha vía de cooperación con CITIC para atraer novos investimentos
Abel Caballero trasladou á dirección do grupo chinés a dispoñibilidade de solo, o potencial industrial e tecnolóxico da cidade e a capacidade de Vigo para acoller novos proxectos.
O alcalde mantivo unha reunión coa dirección do grupo CITIC, encabezada polo seu presidente Zhang Wenwu, na que ambas partes abriron unha vía de cooperación orientada á atracción de novos investimentos industriais e tecnolóxicos e ao reforzo das relacións entre empresas viguesas e chinesas. “Creo que iniciamos unha gran vía de cooperación”, valorou o rexedor, que convidou aos responsables do grupo a regresar a Vigo “o antes posible” para avanzar xa sobre proxectos concretos.
Caballero presentou ante CITIC o potencial económico da cidade, destacando o peso da industria, o desenvolvemento das tecnoloxías avanzadas, a capacidade da Universidade de Vigo para formar persoal técnico e enxeñeiro e a dispoñibilidade de solo para novos investimentos tras a aprobación do Plan Xeral. O alcalde trasladou ademais a posibilidade de transformar máis solo para usos industriais e tecnolóxicos e destacou a estabilidade institucional da cidade como garantía para desenvolver investimentos a medio e longo prazo.
Na reunión abordouse tamén a situación de CENSA, empresa vinculada ao grupo, e a cooperación do Concello para facilitar a súa actividade, especialmente no traslado de grandes pezas desde as instalacións industriais ata o Porto de Vigo. Caballero presentou este apoio como exemplo da disposición municipal a facilitar o desenvolvemento de proxectos empresariais tanto na cidade como no conxunto da súa área.
O encontro concluíu cunha invitación de CITIC a Caballero para visitar China, coa posibilidade de organizar delegacións de empresas de Vigo a cidades como Pequín ou Shanghai para explorar oportunidades de colaboración e investimento. Pola súa parte, o alcalde convidou á dirección do grupo a regresar á cidade para continuar as conversas e avanzar en cuestións concretas.
