“Vigo, cidade de cor” amplía a colección de arte urbana con 15 novos murais
O Concello aprobará o vindeiro luns a licitación do contrato de produción do XII Programa de murais e outros elementos con incidencia sobre a vía pública “Vigo, cidade de cor”, por un importe de 218.000 euros.
“Vamos a contribuír a seguir rexenerando zonas urbanas da cidade”, apuntou o alcalde ao informar do avance na contratación da XII edición do programa “Vigo, cidade de Cor”, que ten un importe de 218.000 euros e un prazo de execución de 3 meses. Inclúe a actuación en quince murais da cidade, trece de nova creación e dous que serán restaurados dada a deterioración sufrida polo efecto da climatoloxía.
“Pintaremos 15 grandes cadros ao aire libre na cidade” para revitalizar a contorna urbana e comercial e poñer en valor o patrimonio da cidade, sinala Caballero que considera que Vigo é xa un “referente na arte urbana” con máis de 192 murais realizados no marco deste programa municipal.
As 15 intervencións previstas nesta edición son as que seguen:
-Pista Polideportiva de Teis – Laura Álvarez
-Pista Deportiva Anduriña – Colectivo Imperdible
-Pista Deportiva Verderol – María Corrales
-Rúa Tomás Alonso, 188 – Liqen
-Avenida Castelao, 28 – Tirso Paz (“Bubble Gum”)
-Rúa Pardillo, 5 – Iria Prol
-Rúa Toxal, 17 – Habraham Barrios
-Camiño Cordoeira, 3 – Vanesa Álvarez
-Muros das escaleiras de Vázquez Varela – Raquel de la Coba
-Escaleiras da rúa Colombia (barrio de Ribadavia) – Roberto Argüelles
-Peche do Colexio María Inmaculada – Cristina Pino e Gustavo Suasnabar
-Barrio de Ribadavia (rehabilitación de mural) – David Lorenzo
-Asociación Veciñal de Lavadores (rehabilitación de mural) - Anthony
-Rúa Hispanidade
-Rúa Cataluña, 40 – Jackeline de Montaigne
Bouzas
A Xunta de Goberno Local do vindeiro luns aprobará tamén a adxudicación da contratación do servizo de deseño e creación de paquetes turísticos en Bouzas, por un importe de 35.000 euros, o que supoñerá un avance na dinamización de Bouzas co Plan de Sostibilidade Turística "Casco histórico da Vila de Bouzas" financiado con fondos Next Generation UE.
Tal e como explicou o rexedor, cos paquetes turísticos, o Concello promoverá unha oferta turística que pon en valor o patrimonio artístico, cultural, natural e histórico, con visitas guiadas ao centro histórico e experiencias inmersivas vinculadas ás tradicións locais.
Ademais, este mes o Goberno municipal aprobou os contratos para elaborar o Plan de Mercadotecnia e de dinamización da festa da Brincadeira; a subministración das luminarias led e doutros elementos da rede viaria, a creación dunha páxina web e a estratexia de promoción dixital do casco histórico, por un importe de 309.101 euros. O investimento total no Plan de Bouzas ascende a 2 millóns de euros.
