Vigo contará cun segundo bus turístico para percorrer a cidade
O rexedor presentou este venres, xunto a Vitrasa, o segundo autobús turístico que permitirá reforzar o servizo e mellorar a capacidade de atención tanto ás persoas que visitan a urbe como á cidadanía.
Vigo suma un novo autobús turístico para descubrir a cidade, unha incorporación que responde ao aumento sostido da demanda e ao crecemento do turismo, e que permitirá reforzar o servizo e mellorar a capacidade de atención a visitantes e cidadanía. Así o sinalou Abel Caballero durante a presentación do bus este venres no Castro apuntando que “Vigo é a única cidade galega que conta cun bus turístico” para descubrir a cidade a quen a visita. Na presentación estiveron Carlos González, director xeral de Vitrasa e María Lago, concelleira de turismo.
O novo bus turístico mantén o formato de dous pisos con teito despregable eléctrico e transparente, similar ao actual, e incorpora elementos gráficos vinculados á cidade, como o Halo, o Estadio de Balaídos, o novo paseo de Bouzas, as Illas Cíes ou Castrelos. Conta con 78 prazas sentadas e dispón dunha praza para persoas con mobilidade reducida (PMR) e plataforma teleférica que garante a accesibilidade.
Desde a súa posta en marcha no ano 2001, o autobús turístico de Vigo superou os 177.000 viaxeiros acumulados e a previsión é que supere os 180.000 usuarios en 2026.
O autobús ofrece un percorrido polos principais enclaves da cidade, cunha duración aproximada de 90 minutos, permitindo descubrir espazos como a Praza de España, o Monte do Castro, a Praza de América, o Parque de Castrelos, o estadio de Balaídos, a praia de Samil, Alcabre ou o porto pesqueiro. Durante o traxecto, o autobús realiza tres paradas: no Monte do Castro, no Parque de Castrelos e na praia de Samil para facilitar a visita aos diferentes espazos. Ademais, os usuarios poderán coñecer a transformación urbanística da cidade, as novas infraestruturas de accesibilidade e o impulso cultural a través da arte urbana.
O bus turístico conta con audioguías dispoñibles en oito idiomas: galego, castelán, portugués, francés, alemán, inglés, italiano e ruso. O servizo funciona con catro saídas diarias, dúas pola mañá (10:00 e 12:00 horas) e dúas pola tarde (16:30 e 18:30 horas), con inicio e fin na Estación Marítima de Vigo. Os billetes poderán adquirirse a través da plataforma Woutick!, nas webs de Vitrasa e Turismo de Vigo, así como directamente a pé de bus con pago mediante tarxeta bancaria ou en efectivo.