Caballero manterá unha xuntanza coa ministra de Deportes e co CSD polo Mundial 2030
O alcalde anunciou que vai “pelexar a fondo” e que xa solicitou unha reunión coa ministra de Deportes, Milagros Tolón, e co presidente do Consejo Superior de Deportes. “Non vou renunciar de ningún modo. A voz de Vigo vai chegar a todas partes”, concluíu.
Abel Caballero foi moi crítico tras as declaracións da delegada da Xunta de Galicia en Vigo, nas que afirmaba que o Concello non se dirixira á Xunta sobre a reforma do Estadio de Balaídos para o Mundial 2030. Caballero desmentiu rotundamente esa afirmación e lembrou que a Xunta coñeceu “absolutamente todo” o proxecto presentado polo Concello de Vigo á Real Federación Española de Fútbol (RFEF) para optar a ser sede deste campionato de fútbol. “Houbo numerosas reunións e trasladóuselles toda a información. Non só coñecían o proxecto, senón que se negaron a asinar a solicitude e posteriormente tamén rexeitaron financiar a parte que lles correspondía”, afirmou.
España ten concedidas 11 sedes, pero a RFEF só enviou 10, “porque non quixo enviar a de Vigo”. Unha decisión que, segundo denunciou, responde a unha instrución política directa: “Porque Alfonso Rueda lle di a Louzán que Vigo non pode ser sede baixo ningún concepto”. “Cando caeu Málaga, Vigo tivo unha nova oportunidade de ser sede e Louzán négase e remítenos unha carta dicindo que non vai enviar a candidatura de Vigo á FIFA”.
O alcalde reiterou que Vigo reformará a grada de Tribuna “con Mundial ou sen Mundial”, pero esixiu que a Xunta e a Deputación asuman a súa responsabilidade financeira: “Estamos a falar da instalación deportiva máis importante de Galicia”, afirmou.