O Concello aprobará este venres o proxecto das Zonas de Baixas Emisións
O alcalde avanzou que Vigo aplicará a normativa “con sentido común, garantindo a continuidade da actividade cidadá e evitando que a medida se converta nun elemento coercitivo”. O rexedor subliñou que “non contempla as sancións como forma de procedemento na ZBE”
Abel Caballero anunciou a aprobación inicial do proxecto da Zona de Baixas Emisións (ZBE) na Xunta de Goberno deste venres, unha medida de obrigado cumprimento para todas as cidades europeas establecida pola Unión Europea.
O proxecto someterase agora a exposición pública durante 30 días, período no que a cidadanía poderá presentar alegacións. Paralelamente, abrirase o proceso de audiencia pública da ordenanza municipal, que regulará xuridicamente o funcionamento da ZBE: acceso de residentes, excepcións, recoñecemento das persoas con mobilidade reducida, condicións para os aparcamentos e o resto de aspectos de xestión.
A Zona de Baixas Emisións de Vigo abranguerá 67 hectáreas, cunha superficie aproximada de 400.000 metros cadrados no centro da cidade, a máis ampla. Tamén serán ZBE a Praza de Portugal, Bouzas e o Calvario. Caballero destacou que a aplicación será “con sentido común, evitando restricións desproporcionadas, garantindo a normalidade da vida diaria e habilitando excepcións para veciños, centros de saúde, negocios ou servizos esenciais”.
O proxecto conta cun investimento de 5,4 millóns de euros, dos que a Unión Europea financia practicamente a totalidade.
Nas súas declaracións, o alcalde reiterou o seu desacordo coa forma na que a Unión Europea impuxo esta medida, ao considerala “unha discriminación social, porque non todo o mundo pode permitirse a compra dun vehículo con etiqueta verde medioambiental”. Engadiu que Vigo aplicará a normativa “con sentido común, garantindo a continuidade da actividade cidadá e evitando que a medida se converta nun elemento coercitivo”. O rexedor subliñou que “non contempla as sancións como forma de procedemento na ZBE”.