O goberno municipal inviste preto de 2 millóns de euros na humanización de San Roque, entre Gregorio Espiño e Reiseñor
O Concello avanza na humanización das rúas San Roque e Couto San Honorato coa aprobación, na xunta convocada para este venres 21 de marzo, das obras entre Gregorio Espino e Reiseñor.
Abel Caballero explicou que a intervención prevista na rúa San Roque conleva un investimento de preto de dous millóns de euros cun prazo estimado de execución de dez meses. Comprende as rúas San Roque e Couto de San Honorato, entre Gregorio Espino, Colombia e Reiseñor.
“Imos humanizar un tramo dun cuarto de quilómetro, dotándoo de máis beirarrúas, maior espazo para os peóns, seguridade na circulación e novos servizos”, explicou o rexedor ao sinalar que “haberá unha praza nova” entre San Roque e Couto de San Honorato que terá unha bancada e zona verde na contorna.
O vial contará cun sentido único de circulación e aparcamento na rúa Talude e Avenida de Gregorio Espino. Tamén se instalará novo mobiliario urbano, renovaranse os servizos de abastecemento e saneamento, rega automática e dotarase á zona cun aparcabicis.
“Seguimos coas humanizacións e esta vez San Roque e un tramo de Couto de San Honorato”, recalcou Caballero.