Lola Galovart toma posesión como Valedora da Cidadanía de Vigo
As dependencias municipais acolleron o acto, presidido polo alcalde da cidade, e no que estivo presente o o anterior valedor, Luis Espada Recarey.
O acto de toma de posesión de Lola Galovart como Valedora da Cidadanía de Vigo contou coa presenza de colectivos sociais, veciñais, membros de Xuízas e Xuíces para a Democracia, concelleiros e representantes doutras institucións da cidade.
Tras a xura do cargo por parte de Galovart, Luis Espada comezou a súa intervención, na que relatou a súa dilatada experiencia no exercicio do cargo. Rematou agradecendo ás institucións colaboradoras, a todas as corporacións municipais coas que desenvolveu a súa actividade e á cidade de Vigo.
Pola súa banda, Lola Galovart sinalou que se trata “de todo un reto” e con este feito “as mulleres rachamos outro teito de cristal”. A exmaxistrada agradeceu ao rexedor que contase con ela para exercer esta responsabilidade afirmando que desenvolverá o cargo “do lado das persoas, pero tamén da administración”, finalmente, afirmou que ten “o obxectivo de intentar mellorar a vida dos demais concidadáns”. O rexedor pechou o acto, comezando a intervención cun agradecemento a Luis Espada como “defensor de tantos dereitos e tanta xente”, así como felicitando á nova Valedora da Cidadanía, apuntando que fará “un labor excepcional”.
Galovart é licenciada en Dereito pola Universidade de Santiago e exerceu de maxistrada en Gran Canaria, Vigo, Ferrol, Ponteareas e Torrelavega. Tamén foi deputada no Congreso na XII lexislatura; vicevaledora do Pobo en Galicia; asesora do Defensor do Pobo; técnica de xestión da Seguridade Social e avogada en Vigo. Amais da súa traxectoria profesional, a nova Valedora da Cidadanía, ten desenvolvido un intenso labor social coa fundación das ONGs “Hoy por ti”, “Alas5”, “Pozos de Agua Mayo Rey” de Camerún, como colaboradora en diferentes proxectos de cooperación internacional e na defensa dos dereitos da muller.
