Vigo consolídase como a cidade co mellor nivel de inglés de toda España
O alcalde deu conta da clasificación publicada por Education First que sitúa a Vigo á cabeza de España no coñecemento do idioma inglés. A cidade consegue esta posición por terceiro ano consecutivo.
Abel Caballero destacou que Vigo volveu ser en 2024 a cidade de España con maior nivel de inglés. Así o reflicte un informe elaborado por Education First Profiency Index que sitúa a Vigo á cabeza da listaxe con 585 puntos, seguida de Gijón e Zaragoza. Esta puntuación consolida a Vigo nun ranking que xa encabezou nos anos 2022 e 2023.
Na súa opinión, esta posición ten moito que ver coas bolsas de inglés do Concello que permiten que cada ano viaxen máis de mil estudantes ao Reino Unido e Irlanda. Ao respecto, o rexedor anunciou a vontade de incrementar estas axudas de inmersión lingüística para “seguir sendo a cidade española que mellor fale inglés”.