O Concello outorga axudas a empresas que contraten alumnado do Vigo Capacita
O alcalde avanzou esta mañá a convocatoria de axudas para as empresas que contraten ao alumnado da novena edición de Vigo Capacita. O Concello xa ten en marcha unha nova iniciativa deste programa de emprego municipal iniciativa que permitirá formar outros 20 estudantes.
O Concello aprobou as axudas á contratación para os estudantes/traballadores participantes na novena edición do programa Vigo Capacita. Segundo explicou Abel Caballero, as empresas de hostalería recibirán 1.500 euros por cada alumno que contraten polo menos tres meses. Son 20 os alumnos e alumnas que recibiron formación nas especialidades de cociña e restaurante. O anuncio para que as empresas poidan presentarse publicarase no BOP e na páxina web municipal.
O alcalde deu conta, así mesmo, da aprobación das bases para a posta en marcha da próxima edición de Vigo Capacita X que conta cun orzamento de 484.000 euros. Tal e como explicou o rexedor, o Concello está a realizar dous procesos selectivos en paralelo, un para as 5 persoas que formarán o equipo docente e outro, para elixir a 20 alumnos/traballadores. As modalidades formativas nesta ocasión son cociña e montaxe e mantemento de paneis solares fotovoltaicos.
A formación en cociña impartirase no Centro Cultural de Valladares, mentres que a de montaxe será o VigoNature. O alumnado recibirá certificados de profesionalidade e cobrará o salario mínimo interprofesional. O programa durará 9 meses e comezará o 2 de decembro.