Abel Caballero: "En Vigo non imos quedar calados ante o que está a suceder en Gaza"
Abel Caballero asegurou hoxe aos participantes na xornada "Gaza. A catástrofe", organizada polas Ong "Hoxe por tí" e "Xuízas e xuíces pola democracia", que "en Vigo non imos quedar calados ante o que está a suceder en Gaza" porque "esta non é unha cidade que se amedrenta e que mira para outro lado. Afrontamos as cousas de fronte, como nos ensinou a nosa propia acción e a nosa historia e queremos afrontar isto e dicirlle a todo o mundo onde estamos e o que queremos mobilizar”, dixo.
O alcalde asegurou hoxe ante as organizadoras da xornada "Gaza. A catástrofe", Dolores Galovart e Magdalena Fernández, os relatores Ernesto Ekaizer, Francesca Albanese, Ana Isabel Tomás e Óscar Camps, e o numeroso público que participou no acto que "as solucións para Gaza virán desde a mobilización social en todos os países do mundo. Desde a presión. Desde lanzar as ideas e as formas alternativas. Desde os compromisos das institucións e dos compromisos das persoas. Desde os compromisos políticos dos que rexemos institucións locais, autonómicas, de España ou posicións internacionais. Desde o Goberno de España e o seu defensa do estado de Palestina”.
Denuncias
Óscar Camps, fundador e director da ONG Open Arms, destacou que a misión conxunta entre Open Arms e World Central Kitchen, que tiña como obxectivo romper o bloqueo marítimo imposto por Israel a Gaza para levar alimentos ás comunidades do norte de Gaza afectadas pola fame negra imposta por Israel e que conseguiu desembarcar unhas 400 toneladas de comida en dúas misións, terminou traxicamente coa morte de sete cooperantes. “Estas organizacións, comprometidas con axudar en situacións de crise humanitaria, enfrontáronse a riscos significativos no seu esforzo por levar asistencia vital á poboación de Gaza. A pesar das súas intencións humanitarias, a operación foi interrompida de maneira violenta, subliñando as difíciles condicións e perigos aos que se enfrontan os traballadores humanitarios en zonas de conflito”, sinalou Camps.
Ana Isabel Tomás Tudela, coordinadora de Recursos Humanos e Finanzas de Médicos Sen Fronteiras en Gaza, falou sobre as principais necesidades médicas e humanitarias, así como a difícil situación que vive a poboación civil, desprazada forzadamente en numerosas ocasións, vivindo en tendas improvisadas sen acceso aos principais servizos básicos, con medo ao constante bombardeo por parte do exército israelí e sen ningunha esperanza despois dun ano. Tamén contou experiencias propias que viviu durante o mes e medio que estivo a traballar no sur da Franxa.
Ernesto Ekaizer, xornalista e escritor de orixe xudía, que pasou a súa infancia en Tel Aviv ao crearse o estado de Israel explicou que “nunca antes xudeus, novos e maiores, se manifestaron en Europa e Estados Unidos contra a política do Goberno israelí. Eses mozos e maiores, aos cales me unín, non se envolveron na bandeira que denuncia o antisemitismo para xustificar o exterminio en Gaza. Non se envolven na denuncia do antisemitismo para negar a existencia de Palestina e do pobo palestino”, destacou Ekaizer.
Josep Borrell, alto representante da Unión Europea para Asuntos Exteriores e Política de Seguridade e Vicepresidente da Comisión Europea, clausurou a xornada vía telemática. Borrell quixo poñer de manifesto que “o horror non só continúa, senón que se multiplicou por cincuenta, e empeora cada día. O nivel de axuda humanitaria que entra en Gaza é o máis baixo desde que empezou a guerra. Catrocentas mil persoas ven obrigadas a desprazarse outra vez desde o norte, o número de vítimas mortais, 40.000, a maior parte mulleres e nenos cunha política deliberada de limitar a axuda humanitaria que entra o que produciu en Gaza unha situación dantesca. Agora na fronteira con Líbano repítese a mesma historia. Borrell destacou que o uso moitas veces desproporcionado da forza co que o exército de Israel estivo operando en Gaza non é un bo sinal para pensar que os civís están protexidos como manda a lei internacional, nin en Gaza, nin en Cisxordania e en Líbano. “Non conseguimos parar a guerra, pero iso non quere dicir que esteamos inactivos, fixemos un gran esforzo de axuda humanitaria e iso salvou moitas vidas, a Unión Europea e os estados membros somos os maiores doantes de axuda humanitaria a Gaza”, sinalou o alto representante da UE quen ademais quixo poñer de manifesto que “fai falta unha solución política ao conflito central da rexión entre o pobo palestino e o estado de Israel. A paz é a única garantía de seguridade a longo prazo, non podemos permitirnos renunciar a buscala, non vai ser fácil pero hai que dar os primeiros pasos e encontros como este poden axudar a iso”.