Caballero celebra a implicación de 1.500 escolares na celebración da Reconquistiña
Abel Caballero, situado hoxe ante os preto de 1.500 alumnos de 34 colexios de Vigo que conformaron a avanzada das tropas viguesas que no día da Reconquistiña fixeron retumbar a Porta do Sol de Vigo co son dos seus tamborís para pedir a liberación da cidade do exército de Napoleón, e anticipar a Festa da Reconquista do próximo fin de semana, chamou a “vivir” e a gozar dunha das festas de referencia da cidade.
Animado polo entusiasmo dos escolares que “tomaron” a Porta do Sol de Vigo para celebrar A Reconquistiña, o alcalde chamou aos preto de 1.500 estudantes de primaria a facer soar os seus tamborís coa máxima forza para conseguir que o eco da histórica celebración da cidade chegue a todos os nenos de España.
“Son tempos de tambores, de Reconquista e de vivir a festa”, proclamou Caballero ante os escolares de 34 centros que quixeron participar na recreación dun dos fitos históricos de Vigo.
