Caballero esixe celeridade á Xunta na autorización para instalar un baño na ETEA
O alcalde criticou en rolda de prensa que a Xunta “tarde sete meses en autorizar unha conexión á rede de abastecemento” e lamentou que a praia da ETEA non teña este verán bandeira azul polo “impedimento” á instalación dun baño.
O Concello de Vigo comezou en xullo a tramitación para a instalación dun baño na ETEA. Abel Caballero decidiu que a praia da ETEA ten que ter bandeira azul, distintivo que esixe ter servizos nas praias como son os baños. Algo que segundo denunciou o rexedor, a praia non acadará o distintivo este verán. O Concello segue a esperar a autorización da Xunta de Galicia para poder instalar un baño na ETEA 7 meses despois.
“O 20 de xullo solicitamos á Xunta a autorización para poder conectar o baño á rede de abastecemento e instalar o aseo público. Catro meses despois, a Xunta dígnase a contestar a solicitude requirindo máis documentación que respondemos inmediatamente. A día de hoxe, tres meses despois, seguimos sen resposta. Sete meses esperando por unha autorización para conectarse a rede de abastecemento”, relatou o alcalde en rolda de prensa.
O goberno local solicitou instalar o baño na confluencia entre a praza de Armas e o camiño á praia da Punta. “Todo o paga o Concello: o aseo, a conexión, a instalación, o mantemento e a limpeza. A Xunta só ten que autorizar”, afirmou.