O Concello garante o “coidado” arqueolóxico ante os novos restos atopados en Carral
O achado podería corresponderse coa base da antiga muralla da cidade, segundo explicou Caballero este mércores, quen avanzou que os arqueólogos municipais e autonómicos analizarán os vestixios e ditaminarán como proceder. “Para nós, os xacementos arqueolóxicos son un ben de primeira magnitude, están por diante de todo”, subliñou Caballero.
![Imaxe dos restos atopados na confluencia de Carral con Porta do Sol, baixo a entrada ao antigo aparcamento soterrado.](https://xornal.vigo.org/storage/images/opt/Vgc0JE1GbMqFxKHU1QApYLRRb5sO3JBkMATy05sr.jpeg)
As obras de peonalización da Porta do Sol continúan desenterrando pezas do pasado da cidade. Desta volta, os restos descubertos na rúa Carral, baixo o acceso do antigo aparcamento soterrado, “poderían corresponderse coa base da muralla da cidade”, segundo avanzou este mércores Abel Caballero en rolda de prensa.
O primeiro edil vigués explicou que, tan pronto apareceron, os arqueólogos dirixiron o proceso que pretende agora determinar o seu grao de conservación e en que medida afecta á obra. Caballero recordou que, antes do comezo dos traballos na Porta do Sol, se realizaron ata tres intervencións arqueolóxicas, de acordo cos técnicos, nas que non se atopou nada.
A execución das obras fixo aflorar vestixios nas partes alta e baixa da praza e agora tamén na unión con Carral, o que “pon de releve que estamos a facer toda a escavación con coidado extremo”, en verbas de Caballero, quen asegurou que no Concello “somos os primeiros interesados no patrimonio arqueolóxico de Vigo”.
A partir de agora os arqueólogos dirán como proceder para analizar os novos restos atopados, o seu estado de conservación e “a forma na que continuará a obra”, indicou Caballero. Farase a escavación arqueolóxica e “seguiremos todo o que digan os arqueólogos”, sinalou: “Para nós, os xacementos arqueolóxicos son un ben de primeira magnitude, están por diante de todo”.