Abel Caballero reclama o compromiso da Xunta co instituto de Navia
Asegura que unha expropiación de solo ao efecto sen a obriga autonómica de construílo sería anulada. O alcalde recordou este mércores que enviara á Xunta hai dous anos un protocolo de actuación para erixir o centro educativo: “Non quixeron asinalo e seguen sen darnos resposta”.
“Teñen que facer un instituto en Navia”, insistiu o alcalde vigués, para evitar que o alumnado teña que desprazarse diariamente varios quilómetros para cursar a Secundaria en Valladares. “Hai dous anos enviei á Xunta un protocolo no que nos comprometemos a ceder o solo para o instituto e eles se comprometen a construílo”, explicou.
Neste sentido, Abel Caballero afirmou que “queremos garantir que en Navia haxa un instituto” e anotou que “non podemos expropiar solo para un instituto que a Xunta non compromete”, xa que o procedemento de obtención do terreo “sería anulado no momento no que o iniciáramos”.
En rolda de prensa, o alcalde contrapuxo a acción da Xunta en Navia -onde non construíu nin unha vivenda protexida baixo o mandato de Núñez Feijóo, afirmou- co traballo do Concello de Vigo no barrio. Así, relatou algunhas das obras executadas polo goberno que preside: un campo de fútbol, un pavillón deportivo con aparcamento, dous parques infantís e un macroparque, un Mais que Auga, a cuberta do patio do CEIP Rodríguez Castelao, a remodelación da Alameda Emilio Crespo, un skatepark, roller e BMX, unha zona deportiva e de ocio, axardinamento de medianas e plantación de arbolado, medianeiras, iluminación, parques biosaudables, parque de enerxías renovables, reparación de fonte, as rotondas en Teixugueiras, a mellora da glorieta da Avenida de Europa, dos accesos desde a VG-20, construción de beirarrúas na rúa Xuncal, beirarrúas, asfaltados, acondicionamento de pluviais, reparación de beirarrúas, muros, elementos de seguridade, beirarrúas entre Teixugueiras e Ricardo Mellora, horta urbana, pasos de peóns elevados, o proxecto de conexión peonil de Navia con A Bouza e a humanización da rúa Teixugueiras.
Precisamente sobre a remodelación de Teixugueiras, que presenta un orzamento de 2,7 millóns de euros, o alcalde anunciou que haberá unha reunión este xoves cos veciños e comerciantes da zona para acordar o modelo de humanización a realizar. Así, o Concello analizará co barrio as dúas opcións posibles: un carril e máis aparcamento ou dous carrís e menos estacionamento.
Por outra banda, Abel Caballero anunciou que o Concello demandará á Xunta de Galicia a remodelación dos estanques de Navia, que “están danados” de forma estrutural e están en garantía, polo que se lle remitirá a reclamación para que estes sexan arranxados.